يعنى ايه سيس .؟؟.؟؟

اظن الموضوع باين من عنوانه وبصراحه الموضوع دا مضايق ناس كتير ومضايقنى انا اوى ( اوعوا تفهموا غلط )

يعنى مثلا لو انت ماشى فى الشارع ونطلك واحد متعرفش منين وقالك مثلا : ازيك ياد يا سيس!

لو صاحبك هتقبلها منو زى ما يكون بيقولك صباح الخير بحكم انكم صحاب وواكلين رز بلبن مع بعض وكده .

انما لو حد غريب قالك : تصدق انت عيل سيس

طبعا انت بشهامة الفرسان هتروح حاطط ايدك على البنطلون وساحب الحزام وهات يا دح فى الزبون .

ولو فرضنا انك بعد ما دقمشت الزبون واديته علقه اخر حلاوه .

فا جالك واحد حليوه كده ملوش فى اى حكايه وقالك انت بتضربه ليه يا ابو الكباتن ؟؟؟

اكيد هترد عليه بكل شجاعه وتقوله اصله قللى : تصدق انت عيل سيس!

طب لو زنقك البرنس دا وسالك: يعنى ايه سيس ؟؟

هتقوله ايه ساعتها يا برنس!!!!!!

اكيد مش هتعرف ترد عارف ليه لانك متعرفش يعنى ايه سيس.

وبصراحه انا مقدرش انكر ان كلمة سيس ليها معنى.

وفى نفس ذات الوقت ابقى بفتى لو قولت انى عارف معناها !! ( دا عبيط دا ولا ايه )

بس كالعاده اننا بنطلع الفاظ وافتكاسات غريبه واحنا مش عارفين معناها.

تعالوا سوا نشوف مع بعض الصيع والعواطليه والعالم الشبيحه وتجار المخدرات قالو ايه عن كلمة ( سيس) ؟

سالنا عماد سلانسيه ( سواق ميكروباص- عايده وفاكتوريا) ؟

قال : والله يا بشمهنذز كلمة سيس دى فى بقونا طول اليوم وبنقولها للعيال اللى مش تمام.

وسالنا صلاح بلوظه ( سواق تاكسى ) ؟

قال : والله يا برنس الهاريه كلهاا فى كلمتين انك لو معرفتش يعنى ايه سيس تبقى انت ولامؤاخذه عيل ( سيس)

-اكيد عم بلوظه بيهزر يا جماعه-

ورغم اننا برضه موصلناش لفك لغز الكلمه دى اصرينا اننا نتابع الحوار ورحنا نسال كل الشباب الهابط

صاحب المستوى الردىء فى التفكير فى طريق بولاق الدكرور

سالنا الحج سعيد كعب الغزال ( تاجر سلاح ) وقال : من الاخر يا رياسه سيس معناها كلمه بتبدا بحرف ال......

فقعدت اعصر دماغى وبعد تفكير كتير قولتله انت تقصد ( ......) صح ؟

بصلى بقرف وسبنى ومشى .

انا برضه قولت اكيد (....) مش كلمه وحشه.

المهم سالنا المعلم زناتى ابو صليبه ( تاجر بورشام)

فقال: انا مش فاهم منك حاجه عيد السؤال تانى؟

فا عدت السؤال تانى

فا سبنى ومشى ولقيته بيقول : الواد دا شنكيف وانا مش فاهم منوا حاجه.

وفى النهايه برضوا مقدرناش نوصل للمعنى الجوهرى لكلمه ( سيس )

المشكله يا جماعه ان سيس دى بقت كلمه فى ضمن الفاظ كتيير بنقولها ونسمعها على طول

والالفاظ دى دخلت بيوتنا وبقت بتتقال بكذا نيه زى مثلا؟

- عيل تشاينيس

- البت دى شحرايه

- الواد دا خيش وقش

- البنت دى فيرى اوملت

- البت دى واتكه

وانا بحزر الناس تخلى بالها عشان الكلمات دى كل واحد بيفهمها بنيه مختلفه عشان الموضوع ممكن يخرج من ايدك

ومش بعيد تلاقى ابنك الصغير بيقول: بابا السيس جه

او اخوكى الصغير يقول: اختى الوتكايه وصلت او الفرس جت بس الفرس اهو شويه

على الاقل لفظ موجود وعارفين معناه

واخيرا لم يظهر يعد المعنى الحقيقى لكلمه سيس

ياريت يا شباب اللى يعرف يقولى الهى ينوبكم ثواب

معاك حق ياعبدو فعلا احنا بقينا

محتاجين قاموس للمصطلحات

الكتير اللي افتكسناها

وان كان ع الكام كلمه دول

تبقي سهلها

وما خفي كان اعظم

تسلم ايدك ياباشا

تسلم يا حبى ربنا يخليك
بس حلوة الافتكسات الجامدة دى وحورات أخترعات :D

اعتقد ان معناها ـ ـ ـ افهمها انت بقى

ده اخر حاجه ممكن اكتبها هنا يعنى

تسلم يا حبى على افتكاساتك

لا اوعى حاسب من فهمى انا هفهما صح متقلقش ;))

اظن يا رايق ان معنى كلمه سيس (...) كلمة من 3 حروف اول حرف ( خـ ..) وكمل انت الباقى

دة اخر كلام يعنى

وبعدين انت افشت الكلمة دى وسبت كلام كتير احنا كل يوم بنقولو ومنعرفش معنى اى كلمة فية

زى كلمة مأكسد كل الناس بتقولها
او تبقا ماشى فى الشارع وواحد ينادى عليك يقولك يا عسلية

لو انت حبيت تعرف معنى الكلمة دى فى مليون كلمة غيرها لازم تعرف معناها الاول على الاقل دى جديدة شوف الكلام القديم بقا

ههههههههههههه حلوه طريقه عرضك للموضوع شدتني وخلتني اكل قراءه الموضوع جميل الموضوع انك بتتكلم علي مصطلحات غريبه عن المجتمع المصري عموما ولكن انزل الشعبيات هتلاقي لغه مختلفه عن الي انت بتتكلم فيها كانك عبرت الحدود ورحت دوله اخري موش هتفهم حاجه من كتر من الناس دي بتخترع كلاام ومصطلحات ياراجل احتمال كبير يكونوا هما نفسهم موش فاهمينها علي العموم موضوع جميل جدا واشكرك عليه وتقبل مروري